Министерот за економија, Крешник Бектеши, соопшти денеска дека ако некој сака да го замени старото возило со ново, ќе има можност да добие субвенција од 2.000 до 3.000 евра. Според него, критериумите за поддршката се уште не се дефинирани, но веројатно ќе базираат на приходите во семејствата. Во првата година се предвидува да бидат опфатени од 200 до 500 возила.
– Мерката за субвенционирање на купување на нови возила со одјава на старо возило има за цел да се зголеми увозот на нови возила во однос на половните и значително ќе се забрза обновата на возниот парк, што значително ќе се влијае на намалувањето на загадувањето на амбиенталниот воздухот.
Субвенции секако нема да добие некој кој има 20, 30 или 40 илјади евра за да купи нов автомобил“ рече Бектеши.
Додаде дека субвенциите ќе започнат да се доделуваат во текот на оваа година доколку тоа го дозволи ребалансот на буџетот, или од почетокот на следната 2020-та.Со Законот за возила предвидени се и субвенции за вградување на плински уреди,
воведување на жолти регистарски таблички за таксистите и унифицирана светлечка табла за такси возилата.
„Со мерката за субвенционирање на трошоци за вградување на уред за погон на ТНГ, метан или друг вид на алтернативно гориво во постоечките возила се предвидува да се субвенцинира 50% од цената на трошоците за набавка и вградување на уредот, но не повеќе од 300 евра во денарска противвредност за возило и се предвидува да бидат опфатени над 1.200 возила на годишно ниво“ рече Бектеши.
Во однос на категоризацијата на возилата, Министерството за економија ќе изготви правилник согласно кој ќе се воведе еколошката налепница за возилата, согласно еколошките стандарди.
Законот предвидува возачите да ја имаат на своите возила на доброволна база, односно не е обврска на сите граѓани. Бојата на налепниците ќе зависи од категоријата на возилото.
„На барање на здруженијата за авто -такси превоз се воведуваат жолти таблици за такси возилата, со цел да се постигне ред во такси превозот, односно да се препознаваат лиценцираните и регистрираните такси возила, и ќе се спречи нелојалната конкуренција во оваа дејност односно забрана за вршење на нерегистрирана дејност. Исто така се воведува и унифицирана светлечка табла за такси возилата“ рече
Бектеши.