Судењето за уништувањето на речиси 3.000 документи поврзани со набавката на опремата за прислушување „Тврдина 2“ е одложено за 26 септември. Рочиштето се одложи на барање на адвокатите на одбраната.
Како што објасни адвокатите, полномошно за овој случај добиле непосредно пред почетокот на судењето и немале време да го разгледаат предметот. Од овие причини бараа одложување на рочиштето на кое требаше да се сослушуваат сведоци. Новото рочиште е закажано за 26 септември.
Обвинителката на СЈО, Ленче Ристоска рече дека се надева дека од септември конечно ќе започнат рочиштата што веќе подолго време се одложуваат.
„Очекуваме дека од септември натаму конечно ќе започнат судењата. Во овој случај одбраната доби нови адвокати кои треба да се запознаат со случајот и ние не смееме да им го негираме тоа право“, рече Ристоска.
Адвокатот на Горан Грујевски, Љупчо Шврговски рече дека одложувањето на денешното рочиште било на негово барање за да може да се запознае со случајот.
Грујевски не сакаше да даде изјава пред новинарите кои чекаа пред судот.
Во овој случај обвинет е Грујевски, поранешен началник во УБК и пет службенички врабтоени во Управата. Грујевски и службеничките се сомничат дека уништиле службена документација поврзана со набавката на опремата за прислушување. Грујевски е осомничен во случаите „Таргет и Тврдина“ и „Тврдина 2“.
Тој беше и еден 18-те лица за кои СЈО бараше притвор, но судот го одби предлогот и му одреди мерки за претпазливост, односно му го одзеде пасошот и му наложи еднаш во неделата да се јавува во судот.
На претходното рочиште, кое се одржа на 23 мај, судијката Лидија Петровска ги прифати доказите на СЈО и за денеска закажа почеток на главната расправа, на која треба да бидат сослушувани сведоци.
Шестмината обвинети тогаш изјавија дека не се чувствуваат виновни за делото за кое се товарат.
Првото рочиште за овој случај се оджа на крајот на ноември 2016 година. Од тогаш не е сослушан ниту еден сведок.