Ракометарките на Вардар ја добија Астраханочка, но ја загубија Барбара Лазович за наредниот период. Словенечката репрезентативка доби удар во пределот на главата и предвреме го заврши натпреварот во Русија во третото коло во Лигата на шампиони што „црвено-црните“ го одбија со 31:26 и останаа на првото место во групата Б по три кола. Во вториот меч Ференцварош беше подобар од Лајпциг со 26:22.
Лазович по средбата беше на болнички третман во Астрахан. Епилог, според информации од таборот на шампионот, се седум конци на капакот на десното око што ќе налага и пауза. Добрата вест во целиот случај е што магнетната резонанца, како што стои на интернет страницата на клубот, не укажа на повреда на окото или потрес на мозокот.
Вардаровата експедиција вечерва се враќа од Астрахан и по пристигнување во Скопје ќе продолжи и лекувањето на Словенката. Деновиве ќе биде познат и точниот период на нејзино ослободување од клупските обврски. Незгодата на Лазович се случи во второто полувреме по судир со две противнички ракометарки. До тој момент беше стрелец на четири гола за ЖРК Вардар.