Во Штутгард и во Дизелдорф законски може да биде забрането возење на постари дизел возила. Ваква одлука денеска донесе Сојузниот административен суд во Лајпциг.
Одлуката на највисокиот сојузен административен суд во земјата следеше откако германските држави поднесоа жалби против забраните наметнати од страна на локалните судови во Штутгарт и Дизелдорф, во случаите поднесени од групата за животна средина ДУХ.
Таа вели дека забраните се неопходни откако во околу 70 германски градови минатата година е надмината границата на Европската унија за присуство на азотен оксид (NOx) во воздухот, што според екологистите е најголем предизвикувач на респираторни заболувања.
ДУХ соопшти дека се надева дека забраните во германските градови ќе го запрат „отпорот“ на индустријата да ги унапреди постарите автомобили кои загадуваат да ги исполнат најновите стандарди на ЕУ.
-Ова е одличен ден за чист воздух во Германија, изјави директорот на ДУХ Јурген Реш.
И германската влада и автомобилската индустрија се спротивставија на забраната, која претставува преседан за целата земја.
Тие стравуваат дека ќе им биде нарушен животот на сопствениците на дизел возилата и возилата ќе ја изгубат вредноста.
Канцеларката Ангела Меркел лобираше против забраната, бидејќи смета дека ова може да предизвика големо незадоволство кај граѓаните и значајно да го наруши секојдневното живеење во градовите.
Дизел моделите на автомобили се најдоа на „црната листа“ откако беше откриено дека Volkswagen лажел на тестовите во врска со емисија на штетните гасови.
Работите се влошуваа по истите вакви обвиненија и за Mercedes-Benz и BMW, па се поголем е бројот на европски метрополи кои донесуваат мерки против дизелите.
Дозволената граница на загадување на воздухот е пречекорена во 70 градови, во 20 дури премногу, покажуваат истражувањата на загадувањет на воздухот во Германија. Последните истражувања на КАР-центарот за истражување на мобилноста на Универзитетот Дуизбург-Есен, се спроведени во првите шест недели од оваа година, при што со 399 мерни станици се мерени вредностите на азотен оксид во 35 градови.
Ваква забрана би била голем удар за германската автомобилска индустрија. Затоа се поголем број производители се свртуваат кон производство на хибридни и електрични возила, а некои (како Porsche) дури најавија и елиминирање на дизел моторите во целост во блиска иднина.
Дизел-скандалот и дискусијата за можни забрани за возење доведоа до тоа бројот на новорегистрираните дизел-автомобили да падне прилично многу – во 2017 година е забележан пад од 13%. Истовремено, регистрирани се 14% повеќе новорегистрирани „бензинци“.