Уставниот суд во Романија донесе одлука со која му нареди на Претседателот на државата да ја разреши главната обвинителка на Националниот антикорупциски директорат Лаура Кодруга Ковеши.
Со ваквата одлука, кулуминираа несогласувањата меѓу Владата и Претседателот кој претходно го одби барањето на министерот за правда да ја разреши Ковеши.
Во годишниот извештај што таа го презентираше во февруари годинава, Ковеши кажа дека во 2017 година пред Суд биле изведени 1.000 функционери под обвинение за корупција. Помеѓу нив има тројца министри, шест пратеници и поранешен претседател на Парламентот. Исто така, таа наведе дека директоратот кривично гонел 713 функционери, вклучувајќи и 28 градоначалници, 38 директори на јавни институции и еден сенатор. „Сепак, корупцијата во Романија е и понатаму голема, на пример некои директори на болници земале милиони евра мито, а злоупотребите на ЕУ фондовите биле двојно зголемени“ рече Ковеши.
Новото раководство на Социјалдемократската партија со месеци се обидува да ја разреши Ковеши која осуди и неколку видни членови на оваа партија, вклучувајќи го и поранешниот партиски лидер за изборни нерегуларности. Владеачката партија ја обвинува дека како шеф на Агенцијата за борба против корупцијата води случаи кои биле политички мотивирани.
По одлуката на Уставниот суд, во Букурешт и во други градови имаше протести на кои насобраните граѓани извикуваа „Стаорци“ и „Крадци“, а граѓанските организации побараат итна средба со Претседателот.
Според нив, обвинувањата на власта за работата на обвинителката се неосновани и ја доведуваат во прашање независноста на судството.
Правниот систем во Букурешт е под посебен мониторинг од Брисел кој стравува дека и во Букурешт може да се зголеми владината контрола врз судството по примерот на популистичките владејачките партии во Унгарија и Полска.
Претседателот на Романија Клаус Јоахнис денеска кажа дека обвинителите “не можат да бидат подредени на кој било политичар, дури и ако тоа е министер”.
Специјалното јавно обвинителство (ДНА), беше формирано во 2006 како еден од условите од Брисел за влез на Романија во Европската Унија.