Published: Tuesday, November 30, 2021 18:48
Судот за човекови права во Стразбур го одби барањето на бизнисменот Орце Камчев на државата да ѝ се изрече времена мерка. Ова всушност значи дека судот одби да ѝ наложи на државата да го пушти Камчев во домашен притвор и да му бидат извршени прегледи од кардиолог.
Адвокатите на бизнисменот Камчев постојано реагираа во изминатиот период дека здравствената состојба на нивниот клиент е влошена, а наводно, тој не го добива содветниот лекарски третман додека е во притвор. Тие реагираа и до Европскиот суд за човекови права од каде побараа одговори од македонската Влада.
Европскиот суд за човекови права, согласно со правилото 39 од Правилата на Судот во случајот на г-дин Камчев, а поради причина на флагрантно и континуирано кршење на неговите основни човекови права, е во постапка за изрекување на времена мерка со која на македонските власти треба да им се наложи под итно да извршат медицински преглед од кардиолог и итно ослободување и сместување во домашен притвор поради неговата влошена здравствена состојба“, се наведуваше во соопштението од неговите адвокати.
– Барањето за времена мерка против државата е одбиено, потврдил владиниот агент Даница Џонова за „Фокус“.
Одговорот на Владата се движел во насока дека на притвореникот му се пружа соодветната здравствена заштита, а тој самиот во неколку наврати одбил да оди на преглед.