Судскиот совет утре нема да одлучува за избор на претседател на Апелацискиот суд во Скопје, ниту пак ќе ја продолжи расправата по претставките за одговорност на неколкумина судии. За утре закажаната седница е одложена поради, како што се наведува во писменото известување, службено отсуство на претседателот и на дел од членовите.
За прв човек на Апелација има најмалку седум кандидати, но оние кои се вртат во јавноста се на Огнен Ставрев и Гордана Спиревска.
Од 15 овој месец Судскиот совет ја започна постапката за утврдување одговорноста на неколкумина судии.
Дури 270 претставки против судии во моментов се наоѓаат пред Судскиот совет.
-Моментално пред Судскиот совет се покренати постaпки за разрешување на пет судии. Како што ќе се разгледуваат етапно овие 217 претставки, така ќе се знае за евентуални нови постапки за разрешување на судии. Дел од овие 270 поднесени претставки се поплаки од незадоволни граѓани, странки во судските постапки, што секако нема да преминат во постапки за разрешување, изјави тогаш претседателот на Судскиот совет, Зоран Караџовски.
Засега не се откриваат нивните имиња, но имајќи предвид дека барањата се наследени од Советот за утврдување факти, кој беше укинат, но јавно објави за кого ќе бара одговорност, веројатно тоа се дел од петчлениот кривичен совет на Врховниот суд, кој го ослободи од притвор бизнисменот Сеад Кочан, обвинет во случајот „Труст“ на СЈО.
На забелешката дека е можно одолговлекување на постапката, претседателот на Судскиот совет Караџоски уште на претходната седница рече дека има механизми тоа да не се дозволи.
-Често пати се случуваат проблеми со доставувањето на писмената и поканувањето, но законот предвидел добри механизми, такашто сметам дека нема долго да трае постапката кај тие комисии, а по завршувањето на дејствијата на комисиите рокот за доставување во кој што треба да поднесе извештај до Советот е 15 дена, рече Караџоски.
Токму Предлог-законот за изменување и дополнување на Законот за Судскиот совет на Република Македонија, како и Предлог-законот за изменување и дополнување на Законот за судовите се на денешната владина седница.
Во образложението на предложените законски измени за Судскиот совет се вели дека основната цел на Законот е внесување мерливи квалитативни критериуми за оценување на работата на судиите и претседателите на судовите на секои две години.