Судскиот совет најверојатно утре ќе одржи седница на која ќе се дискутира за одлуката на Апелацискиот суд во Скопје кој денеска ја прифати гаранцијата од над 11 милиони евра со што му се овозможува на поранешниот шеф на УБК Сашо Мијалков да излезе од притвор.

  – Со оглед на тоа дека поголем број членови на Судскиот совет денеска имаа службени обврски, особено што претседателката имаше седница на Комисијата за политички систем во Собранието, на која се дебатира за годишниот извештај на Судскиот совет за 2020 година, Советот не беше во можност денеска да дебатира во врска со притворот, но тоа ќе го стори наскоро, најверојатно утре, на седница на работното тело на Советот. Јавноста навремено ќе биде известена кога Судскиот совет ќе има став по ова прашање, вели портпаролот Љубиша Арсиќ во изјава за НоваТВ. 

Министерот за правда Бојан Маричиќ побара од Судскиот совет да испита по која основа судиите ја донеле одлуката за притворот на Мијалков. Тој ги прозва судиите од Апелациониот суд во Скопје Ѓоко Ристов и Енвер Беџети да `и објаснат на јавноста како ја донеле одлуката и на кој начин ќе ја преземат одговорноста ако се случи обвинетиот повторно да избега.

Според министерот за првада, судот иако е независен, должен е јавно да ги објаснува своите одлуки за да можат граѓаните да веруваат во судството.

Нова ТВ побара реакција и од Основното јавно обвинителство, со оглед на тоа што Вишото јавно обвинителство излезе со негативно мислење за жалбата на Мијалков, против одлуката за притвор и понудената гаранција. Оттаму, потсетуваат дека надлежното обвинителство не се согласило да му се прифати гаранцијата на Мијалков и да му се укине притворот.

– Согласно законските надлежности Вишото јавно обвинителство Скопје до Апелацискиот суд Скопје достави писмен предлог да се одбие изјавената жалба од обвинетиот. Надлежност на судот е да одлучува по конкретната жалба, ценејќи ги притоа сите околности во предметот, велат од Обвинителството за Нова ТВ.

Апелациониот суд, сепак одлучи да му го укине притворот на Мијалков, а му определ други мерки за обезбедување – одземен пасош и јавување во суд.

На барање на Нова ТВ за оваа одлука што предизвика грамада негативни коментари и реакции на сметка на судската власт да се произнесе и јавниот обвинител Љубомир Јовески, во писмен одговор од Јавното обвинителство велат дека своите мислења тој ги изнесува во рамки на законски предвидената постапка и не ги коментира одлуките на надлежниот суд.

Поранешниот шеф на УБК, се очекува да излезе од притвор, откако имотот што е приложен во гаранцијата ќе биде ставен под хипотека.

Укинувањето на притворот на Мијалков дојде во бурен ден на политичката сцена кога од премиерската функција замина Зоран Заев, а претседателот Стево Пендаровски во Собранието штотуку испрати пораки дека македонското судство ја има изгубено довербата кај граѓаните и дека најважен аспект во изградбата на функционална правна држава е еднаквоста пред законот. Претседателот недвосмислено порача дека со законите што ги носиме не смееме да ги привилегираме оние кои не го почитуваат поредокот, наспроти оние кои го почитуваат.

Владејачката партија, пак под водство на Димитар Ковачевски одлуката на Апелацискиот суд  да ја прифати гаранцијата со што на Сашо Мијалков му се укинува притворот ја оцени како скандалозна и силен удар врз правдата затоа што осуденикот издржува мерка притвор во предметот „Трезор“ каде што е осуден на 8 години затвор, со уште не правосилна пресуда. Исто така, за Мијалков има и втора неправосилна пресуда од 12 години за нелегеланото прислушување. СДСМ потсети и на тоа дека Мијалков беше недостапен за институциите и дека и сега ризикот за негово бегство е повторно голем. Според СДСМ, одлуката на апелациските судии  директно ја загрозува правдата, не само за овој предмет, туку и за сите останати кои се водат против Мијалков, но и против други поранешни функционери на ВМРО-ДПМНЕ.

Стојанка Митреска