Секторот за внатрешна контрола во МВР денеска суспендираше шестмина полицајци инволвирани во насилните протести во Собранието. Според информациите на НОВА, за петмина од нив е утврдено дека не интервенирале кога неколкумина пратеници од ВМРО-ДПМНЕ ја отвориле главната врата на Парламентот на демонстрантите и тие влегоа внатре. Сите петмина се вработени во Секторот за обезбедување познат како Шеста управа.
Шестиот полицаец е суспендиран со образложение – спречување на службено лице во извршување на службена должност. Односно, според информациите на НОВА, тој го нападнал својот колега од МВР, кој по службена должност го обезбедувал екс министерот за внатрешни Оливер Спасовски.
Ова се првите одлуки на Секторот за внатрешна контрола во МВР по крвавиот 27. април за злоупотреба на службената положба на полицајци кои критичниот ден биле на работна задача во Собранието.
Како што објави НОВА ТВ, на чело на Секторот за внатрешна контрола од 3 мај е назначен нов помошник министер, Дејан Андонов, на местото на досегашната Анета Станчевска.