За утре во Анкара е закажана конститутивната седница на новиот состав на турскиот Парламент на која народните избраници ќе положат свечена заклетва пред стапување на функцијата. По церемонијата е предвидено и обраќање на претседателот на државата, Реџеп Таип Ердоган по што ќе следува и истакнување на кандидати за претседател на законодавниот дом. Очекувањата одат во насока оти кандидат на владејачката Партија за правда и развој (АКП) ќе биде актуелниот премиер, Бинали Јилдирим. Изборот е закажан на 12 јули.
Три дена претходно (9 јули), претседателот Реџеп Тајип Ердоган ќе даде заклетва пред Парламентот со што и официјално ќе почне неговиот нов мандат. Истата вечер во претседателска палата ќе се одржи прием на кој се поканети над 3.000 гости меѓу кои и претставници на политички, бизнис, спортски и уметнички кругови, како и странски лидери.
Шефовите на држави и влади од 17 земји потврдија дека ќе присуствуваат на церемонијата на која ќе се одбележи и преминувањето во новиот претседателски систем на управување. По заклетва во Парламентот, предвидено е Ердоган да го издаде и првиот претседателски декрет со кој ќе бидат основани нови министерства.
Составот на новиот Кабинет се очекува Ердоган да го соопшти во понеделник навечер.
На 24 јуни, во Турција се одржаа претседателски и парламентарни избори пришто сегашниот шеф на државата беше реизбран. Согласно ланските уставни измени по овие избори во земјата се воспоставува нов систем на владеење што ќе предвидува широки овластувања на претседателот.