Денешното рочиште за случајот „Тенк“ на СЈО почна со сослушување на сведокот Љупчо Цековски, вработен во МВР. Покрај него денеска како сведоци на одбраната во Кривичниот суд во Скопје се присутни уште десетина лица, како и обвинетите Никола Груевски и Ѓоко Поповски.
Поранешната министерка за внатрешни работи Гордана Јанкуловска, која е обвинета во случајот, не е присутна, бидејќи на минатото рочиште за неа беше издвоена постапката поради ризична бременост.
Сведокот Љупчо Цековски кој бил член на обезбедувањето на Груевски рече дека поранешниот премиер се возел со старо блиндирано возило кое често се расипувало.
Тој раскажа случка од 2015 година кога Груевски требало да се вози од неговот дом до Владата, а блиндираното возило не сакало да стартува, поради што тогашниот премиер бил возен во друго несоодветно возило. Додаде дека често се случувало да има дефект на возилото и за негова поправка се чекало по еден месец. Тогаш, како што рече сведокот, возила се позајмувале од МВР.
Вториот сведок Маријан Тушевски, исто така, вработен во МВР, од 2017 година го обезбедувал Никола Груевски.
И Тушевски кажа дека блиндираното возило често се расипувало и оти во една прилика кога го однеле на сервис мајсторот им рекол „уште ли ја користите оваа канта“. Рече дека дознал оти е купено ново блиндирано возило кога во посета на Македонија беше поранешниот генерален секретар на Обединетите нации Бан Ки-мун, кој се возел во новото возило.
Тушевски додаде дека новиот мерцедес се користел по потреба кога старото блиндирано возило било во дефект. Тој, како и претходниот сведок, рече дека мерцедесот бил користен за странски делегации.
Пред Судот исказ даде и третиот сведок Ацо Јаневски исто така вработен во МВР, кој бил личен возач на Груевски.
Јаневски рече дека често се соочувале со механички проблеми од кои како главен проблем биле гумите на возилото, барајќи такви гуми веќе не се произведувале и морале да стават други, со што како што додаде, била загрозена безбедноста на премиерот.
– Такви неисправни возила не треба да бидат во употреба, рече Јаневски, додавајќи дека сугерирале до надлежните дека возилото не е за користење и оти треба да се најде соодветна замена.
Предметот „Тенк“ на СЈО се однесува за набавката на луксузниот мерцедес од 600 илјади евра, а обвинети се поранешниот премиер Никола Груевски, поранешната министерката за внатрешни работи Гордана Јанкулоска и поранешниот помошник министер во МВР Ѓоко Поповски.