Поддршката од Светска банка за Република Северна Македонија за справување со последиците од корона-кризата ќе изнесува околу 140 милиони евра. Дел од средствата (околу 90 милиони евра) ќе се наменат за нов проект за брзо дејствување против ковид-19, а останатите 50 милиони евра за мерката за „финансиска поддршка од 14.500 денари по вработен“ за работодавачи и самостојни вршители на дејност.
За ова било дискутирано на состанокот на потпретседателот на Светска банка за Европа и Централна Азија, Сирил Милер со вицепремиерката и министерката за одбрана Радмила Шекеринска, вицепремиерката за економија Мила Царовска, гувернерката на Народната банка Анита Ангеловска-Бежоска и министерката за финансии Нина Ангеловска, соопшти Министерството за финансии. На состанокот учествуваше и наследничката на Милер, Ана Бјерд која од 1 мај ќе ја преземе функцијата.
Во дискусијата беа детално презентирани ефектите од глобалната корона-криза врз македонската економија, а се разгледаа и економските мерки за справување со шокот од пандемијата. Од Светската банка ги оценуваат како позитивни, навремени и таргетирани мерките што во рамки на своите надлежности ги преземаат Владата и Народната банка.
Акцент бил ставен и на стабилноста на финансискиот систем, при што и овојпат е нагласено дека тоа мора да остане приоритет. Во тој контекст, одделно се разговараше за активностите и мерките на Народната банка што се однесуваат на стабилноста на банкарскиот систем, која е клучна за одржување и јакнење на севкупната финансиска стабилност. Досега преземените мерки се сметаат за дополнителна гаранција дека стабилноста ќе биде одржана, а особено е важно што системот има капацитет да се справи со шокот што се должи и на прудентната регулатива, во голема мера усогласена и со европските регулативи.
Соодветниот одговор на носителите на политиките во однос на предизвиците што ги задава корона-кризата се значаен сигнал за поддршката што Светската банка ја дава за Северна Македонија. Со 50 милиони евра од Светска банка, ќе се поддржи мерката со која ќе се даде финансиска поддршка од 14.500 денари по вработен за исплата на плати во април и во мај. Аплицирањето за оваа мерка започнува од почетокот на мај.
Освен финансиски, Светска банка учествуваше и советодавно во мерката, а препораките кои се базираа на технички анализи, искуства од претходни големи кризи, но и мислења собрани преку консултации со приватниот сектор, вклучително и во Северна Македонија, беа вклучени во главната рамка усвоена од страна на Владата.
Новиот проект за брзо дејствување против последиците од корона-кризата во износ од 90 милиони евра се состои од две компоненти. Првата компонента за итен одговор се однесува на зајакнување на здравствените капацитети со обезбедување на зголемување на капцитети за тестирање, техничка експертиза, лабораториска опрема, заштитна опрема, медицински помошни материјали и опрема, реновирање на здравствени установи, развој на системи за навремено откривање на случаи и следење на контакт, во согласност со упатствата на Светската здравствена организација (СЗО), како и финансирање на придонесот за здравствено осигурување за ранливи корисници.
Втората компонента за поддршка на домаќинствата се однесува на обезбедување на поддршка за трансфери за ранливи домаќинства погодени од последиците од ковид-19 и паричен надомест за оние кои ги изгубиле работните места како резултат на кризата.
На средбата беа разгледани и проекциите од последниот Регионален економски извештај на Светска банка, согласно кој се предвидува забавување на економиите во земјите од Западен Балкан меѓу -3 и -5,6 отсто. Според Светска банка, Северна Македонија ќе има најмало забавување на економијата помеѓу -1,4% и -3,2%, се наведува во соопштението од Министерството за финансии.