Реал Мадрид ќе биде противник на Гремио во големото финале на Светското клупско фудбалско првенство во Абу Даби. „Кралскиот“ клуб во полуфиналето ја совлада Ал Џазира со 2:1 со пресврт во второто полувреме и по третпат од 2000 година ќе игра за трофејот во натпреварувањето на ФИФА.
Домашниот состав предводен од Холанѓанецот Хенк тен Кате изненадувачки обезбеди предност од 1:0 по воведното полувреме на стадионот „Зајед“ во Обединетите Арапски Емирати. Заслуги за тоа имаа Ромарињо за погодокот во 41 минута, но и голманот Али Хасиф Хусани со своите интервенции до паузата.
Но, можеби, еден од клучните моменти во средбата се случи непосредно по почетокот на вториот дел. Хусани поради повреда беше принуден да ја отстапи позицијата меѓу стативите на Кален ал Сенани по што набрзо дојде и израмнување во продукција на Кристијано Роналдо. Португалецот погоди во 53 минута и се јави во улога на асистент на Герет Бејл во 81. за водство со 2:1, резултат што остана непроменет до крајот на средбата.
Реал Мадрид има две титули на Светското клупско фудбалско првенство. Првата ја освои во 2014 година по триумфот над аргентински Сан Лоренцо со 2:0, втората ја понесе лани со победата над Кашима Антлерс со 4:2.
Гремио, пак, во првото полуфинале ја совлада мексиканска Пачука со 1:0 со голот на Евертон во петтата минута од продолженијата.