СЗО ги охрабрува земјите да придонесат за собирање и споделување на податоци за хоспитализирани пациенти преку Платформа за клинички податоци на СЗО COVID-19 за брз опис на клиничките карактеристики и исходите кај пациентите.
Варијантата Омикрон ќе се шири, најверојатно, на меѓународно ниво, што би можело да претставува „многу висок“ глобален ризик, соопшти денеска Светската здравствена организација.
Но, како што се нагласува во најновото соопштение, сè уште не е јасно дали Омикрон е попренослив ( полесно се пренесува од човек на човек) во споредба со останатите варијанти, вклучително и Делта.
Бројот на луѓе заразени со оваа најнова варијанта не е зголемен во делови на Јужна Африка каде истата е откриена, a во тек се епидемиолошки студии за да се разбере дали тоа е токму поради Омикрон или и поради други фактори.
– Омикрон има голем број мутации, од кои некои се загрижувачки поради нивното потенцијално влијание врз текот на пандемијата, нагласуваат од СЗО.
„Вкупниот глобален ризик поврзан со Омикрон се оценува како висок“, додаде СЗО.
Првата препорака до земјите-членки на оваа организација е да ги прилагодат „мерките за меѓународно патување“, а наскоро ќе бидат издадени подетални упатства.
Тежина на болеста
Сè уште не е јасно дали инфекцијата со Омикрон предизвикува потешка болест во споредба со инфекциите со други варијанти, вклучително и со Делта. Прелиминарните податоци сугерираат дека има зголемени стапки на хоспитализација во Јужна Африка, но ова може да е поради зголемениот вкупен број на луѓе кои се инфицираат, наместо како резултат на специфична инфекција со Омикрон.
Во моментов, нема информации кои сугерираат дека симптомите поврзани со Омикрон се различни од оние од другите варијанти. Првичните пријавени инфекции беа меѓу универзитетските студенти – помлади поединци кои имаат тенденција да развиваат поблага клиничка слика на болеста – но разбирањето на степенот на сериозноста на варијантата Омикрон ќе трае од неколку денови до недели.
Сите варијанти на ковид-19, предупредува СЗО, вклучително и варијантата Делта која е доминантна ширум светот, може да предизвикаат тешка болест или смрт, особено за најранливите луѓе, и затоа – превенцијата секогаш е клучна.
СЗО ги охрабрува земјите да придонесат за собирање и споделување на податоци за хоспитализирани пациенти преку Платформа за клинички податоци на СЗО COVID-19 за брз опис на клиничките карактеристики и исходите кај пациентите.