Светската здравствена организација ја прогласи епидемијата на мајмунски сипаници за светска вонредна состојба. Ова според правилата на СЗО е највисоко предупредување кое може да го издаде при пораст на случаи на мајмунски сипаници во светот.
Тревогата е прогласена по вториот состанок на Комитетот за итни состојби на СЗО.
„Бројката достигна над 16.000 случаи од 75 земји“, соопшти генералниот директор на СЗО, д-р Тедрос Аданом Гебрејесус. Досега имаше пет смртни случаи како резултат на избувнувањето, додаде тој.
Д-р Тедрос рече дека Комитетот за итни случаи првично не можел да постигне консензус за тоа дали појавата на мајмунски сипаници треба да се класифицира како глобална здравствена вонредна состојба.
Сепак, тој рече дека избувнувањето брзо се проширило низ целиот свет и дека Комитетот одлучил дека мајмунските сипаници навистина треба да бидат предмет на меѓународна загриженост.
„Проценката на СЗО е дека ризикот од мајмунски сипаници е умерен на глобално ниво и во сите региони, освен во европскиот регион, каде што го оценуваме ризикот како висок“, додаде тој. (Би-Би-Си)