Пандемијата на ковид предизвика смрт на речиси 15 милиони луѓе ширум светот, проценува Светската здравствена организација (СЗО). Тоа е 13 посто повеќе смртни случаи отколку што вообичаено се очекуваа. СЗО верува дека многу земји пријавиле помалку починати од ковид отколку реалната бројка- пријавени беа само 5,4 милиони.

Само во Индија имало 4,7 милиони смртни случаи од ковид, што е 10 пати повеќе од официјалните бројки – и речиси една третина од смртните случаи од ковид на глобално ниво. Индиската влада ја доведе во прашање проценката, велејќи дека се сомнева во методологијата, меѓутоа и други студии дојдоа до слични заклучоци за обемот на смртните случаи во земјата.

Методологијата што ја користи СЗО се нарекува прекумерна смртност – колку повеќе луѓе умреле отколку што вообичаено би се очекувало врз основа на смртноста во истата област пред да ја погоди пандемијата.

Овие пресметки, исто така, ги земаат предвид смртните случаи кои не биле директно поради ковид, туку предизвикани од неговите ударни ефекти, како што се немање пристап на луѓето до болниците. Исто така, се должи на лошото водење на евиденција во некои региони и ретко тестирање на почетокот на кризата. Но, СЗО рече дека поголемиот дел од дополнителните 9,5 милиони смртни случаи наспроти 5,4 милиони пријавени смртни случаи од ковид се директни смртни случаи предизвикани од вирусот, наместо индиректни смртни случаи.

Зборувајќи за размерите на бројките, д-р Самира Асма, од одделот за податоци на СЗО, рече „Тоа е трагедија. Тоа е неверојатна бројка и за нас е важно да им оддадеме почит на изгубените животи и мораме да бараме одговорност од креаторите на здравствената политиката“, рече таа. „Ако не ги броиме вистински починатите, ќе ја пропуштиме можноста да бидеме подобро подготвени за следниот пат“, додаде Асма.

Покрај Индија, земјите со најголем број смртни случаи, кои пропуштиле да ги стават во домашните статистика се и Русија, Индонезија, САД, Бразил, Мексико и Перу, покажуваат бројките на СЗО. Бројките за Русија се три и пол пати повеќе од регистрираните смртни случаи во земјата.

Извештајот исто така ги разгледува стапките на прекумерна смртност во однос на големината на населението во секоја земја. Стапката на смртност во Обединетото Кралство – како и во Америка, Шпанија и Германија – го надмина глобалниот просек во текот на 2020 и 2021 година.

Меѓу земјите пак кај кои нема голема разлика меѓу пријавените и реалните бројки на починати се Кина, која сè уште спроведува политика на „нулта ковид“ која вклучува масовни тестирања и карантини, Австралија, која воведе строги ограничувања за патување за да го задржи вирусот надвор од земјата, и Јапонија и Норвешка. (Р.Н.)