Светската здравствена организација предупреди дека претстојната зима ќе биде „опасна по живот“ за милиони Украинци, по серијата разорни руски напади врз електричната мрежа во земјата.
„Едноставно кажано, оваа зима ќе биде борба за опстанок“, изјави за новинарите Ханс Клуге, регионален директор за Европа во здравственото тело на ОН за време на посетата на Киев. „Оваа зима ќе биде опасна по живот за милиони луѓе во Украина“, рече тој.
Оштетувањето на енергетската инфраструктура на Украина предизвикано од повеќекратни ракетни напади „веќе влијае на здравствениот систем и на здравјето на луѓето“, посочи Клуге.
Тој рече дека од почетокот на руската инвазија во февруари, СЗО регистрирала повеќе од 700 напади врз здравствени установи во Украина. Ова е „јасно кршење“ на меѓународното хуманитарно право, нагласи Клуге. „Континуираните напади врз здравствената и енергетската инфраструктура значат дека стотици болници и здравствени установи веќе не се целосно функционални“.
„Очекуваме уште два до три милиони луѓе да ги напуштат своите домови во потрага по топлина и безбедност“, предупреди тој. „Тие ќе се соочат со уникатни здравствени предизвици, вклучително и респираторни инфекции како Ковид-19, пневмонија, грип и сериозен ризик од дифтерија и сипаници кај недоволно вакцинирана популација“.