Расправата која трае веќе четири дена во Собранието пред гласањето за импичмент на претседателот Ѓорѓе Иванов, по предлог на пратениците на СДСМ, а поддржан од пратеничката група на ДУИ и независните пратеници, денеска продолжи со фокус на градоначалникот на Битола, Владимир Талевски.
Во меѓусебната расправа помеѓу пратениците, Талевски е цврсто поддржуван од пратениците од ВМРО-ДПМНЕ, додека строго критикуван од опозициските пратеници.
Расправата се разжести кога Зоран Илиовски потенцираше најпрво дека за да се покрене одговорност за Иванов, треба правно да бидат прекршени Уставот и законите, а Комисијата оценила дека нема основаност за покренување постапка, а потоа продолжи да зборува за Шарената револуција и за Зоран Заев.
– Продолжувате со непочитување на ниедна институција во државата. Прикажувате дека зад вас стои народот, а тоа што ќе соберетен стотина луѓе и ќе шарате тоа е народ? Тоа е платеничка револуција, рече Илиовски кој во својот говор го бранеше битолскиот градоначалник.
Според Васко Ковачевски, пратеник од редовите на опозицијата пак, кој исто така е битолчанец, рече дека градоначалникот бил криминалец.
– Срам е да се брани Владимир Талевски, криминалец. Срам да ви е што го браните. Како победил во Битола, знаат граѓаните. Ние во Битола знаеме дека тој е гробарот во Битола и ќе заврши каде што заслужува, во затвор, потенцираше Ковачевски.
Ова пак, го налути координаторот на пратениците од ВМРО-ДПМНЕ, Илија Димовски кој на Ковачевски му порача дека не му е местото во Собранието бидејќи народот не го сакал.
– Васко, ти ќе кажеш кој ќе иде во затвор. Немој да мислите дека овој народ мирно ќе седи и ќе гледа како правите насилство во државата. Вие кога требало да добиете поддршка од граѓаните во Битола не сте добиле и не треба да сте тука, рече Димовски.
За тоа како течеше дел од расправата, во видеото.