Техеран преку Пакистан достави мировен план до Вашингтон со кој бара укинување санкции, повлекување на војската и нов механизам за Ормускиот теснец.
Иран преку Пакистан им доставил на Соединетите Американски Држави предлог од 14 точки за ставање крај на конфликтот, кој вклучува гаранции за ненапаѓање, повлекување на американските сили и укинување на санкциите и поморската блокада. Според иранските агенции Tasnim и Fars, планот предвидува и решавање на клучните прашања во рок од 30 дена.
Во документот, Техеран бара ослободување на замрзнатите финансиски средства, исплата на отштета и целосно укинување на санкциите. Дополнително, планот опфаќа и завршување на конфликтите на сите фронтови, вклучително и во Либан.
Еден од клучните елементи е воспоставување нов механизам за управување со Ормускиот теснец еден од најважните енергетски коридори во светот.
Иранскиот одговор доаѓа како реакција на американски план од девет точки. Додека САД предложиле двомесечен прекин на огнот, Техеран инсистира на побрзо решение и финализирање на клучните прашања во рок од еден месец.
Според Fars, иранскиот документ претставува „патоказ за крај на војната“, со јасно дефинирани „црвени линии“.
Иран очекува официјален одговор од Вашингтон на доставениот предлог. Засега нема индикации дали американската страна ќе ги прифати условите, особено оние што се однесуваат на санкциите и военото присуство во регионот.