Роџер Федерер (36) е победник на силниот Мастерс во Мајами вреден 6,9 милиони долари. Во 139. финале во кариерата, Швајцарецот го совлада Рафаел Надал со 6:3, 6:4 за негова, вкупно, 91 титула на АТП турот. Клучниот момент се случи во деветтиот гем од вториот сет во кој успеа да направи брејк што го потврди во наредниот за конечна победа и воодушевување меѓу навивачите на трибините на централниот терен.
Час и 35 минути му беа потребни на Федерер за освојување на третиот трофеј на тенискиот турнир на Флорида, прва по пауза од 11 години, но трет и во тековната сезона по Австралија опен и Индијан Велс. Во сите три финални мечеви во 2017 година беше подобар од Надал.
Швајцарскиот ас, кој игра како во своите најдобри денови, направи по еден брејк во двата сета што беа доволни за ново воодушевување на светската спортска јавност. Беше отпишан по лошата 2016 година, многумина предвидуваа крај на неговата кариера меѓутоа оваа ја игра како од соништата и, досега, остава убедливо најсилен впечаток.
АТП Мајами – серија Мастерс 1000 – награден фонд 6,993.450 милиони долари
Финале: Федерер (Швајцарија) – Надал (Шпанија) 6:3, 6:4