Новак Ѓоковиќ ја искористи четвртaта меч топка во финалето со Енди Мареј и ја одбрани титулата на АТП турнирот во Доха од серијата 250. Конечни 6:3, 5:7, 6:4 за вториот светски рекет во првото соочување со најдобриот во новата сезона за, воедно, 25 победа во 36 меѓусебен дуел.
Ѓоковиќ уште на Божик покажа дека е повторно оној стариот, онаков каков навикнаа да гледаат неговите фанови и онаков каков што тие посакуваат. Ако се суди според настапот во Катар, двајцата тенисери ќе водат главен збор за светскиот тениски трон и оваа сезона. Нејзиниот почеток е реприза на ланската, а по успешната одбрана на титулата испиша „Мир Божји“, со кирилични букви, на камерата на „Евроспорт“, порака што ја врами во срце како честитка до сите кои го празнуваат денешниот голем христијански празник.
Притисокот, секако, е врз српскиот ас кој едноставно мора да ги повтори делата од 2016 година до Ролан Гарос бидејќи во прашање се многу бодови во овој дел од сезоната. Нивната одбрана е неминовна за што Ѓоковиќ е совршено свесен за одржување на достижната разлика на АТП листата, па потоа, во второто шестмесечје, да тргне во напад на лидерската позиција.
Мареј ја зголеми разликата на АТП листата
Во Доха ги одбрани 250-те од лани меѓутоа разликата, сепак, незначително ќе се зголеми бидејќи Британецот не бранеше ништо. Покрај бодовите, победата е значајна за Ѓоковиќ за неговата самодоверба што прилично беше разнишана по настапот во Париз, а потоа и по нивниот судир на завршниот Мастерс во Лондон кога и дефинитивно беше јасна детронизацијата.
Пресудниот момент во финалето беше седмиот гем во решавачкиот, трет, сет. Ѓоковиќ го освои сервисот на Мареј пришто го остави на нула за корекција на загубата во финишот на вториот сет кога имаше 5:3 плус 30:0 плус три меч топки, а Британецот се одбрани во сите ситуации, „врза“ четири гема во низа и успеа до израмнување на 1:1.
Ова е 67 титула во кариерата на Ѓоковиќ со која даде до знаење дека се наоѓа во одлична форма, а турнирот во Доха како одличен залет за Австралија опен што почнува за осум дена.
АТП Доха
Финале: Ѓоковиќ (2., Србија) – Мареј (1., В. Британија) 6:3, 5:7, 6:4