Единицата за тениски интегритет (ЕТИ) соопшти дека е поведена истрага за три меча од годинашното издание на Вимблдон и за еден на Ролан Гарос под сомнение дека биле наместени. Предметните случаи им влегоа во око на тениските авторитети по невообичаено високи уплати во обложувалниците ширум светот.

Она што е достапно како информација за јавноста е дека во фокус се мечеви од квалификации за главните турнири на гренслемите во Лондон и во Париз. Имињата на тенисерките засега се држат во тајност.

Со овие четири меча под лупата на ЕТИ се најдоа вкупно 53 од април наваму. Од организацијата притоа истакнуваат дека процедурата за обработка на случаите е рутинска, но не е исклучена можноста за „лажна тревога“.

Од посочената бројка на мечеви под истрага на ЕТИ, три доаѓаат од АТП турот, еден е од ВТА турот додека останатите припаѓаат на категориите Челинџер, Фјучерс и ИТФ турнири во женска категорија.