Дејан Митревски – Урко, поранешниот шеф на обезбедувањето на екс премиерот Никола Груевски денеска не се појави во Кривичниот суд, каде требаше да сведочи во предметот „Тенк“ на Специјалното јавно обвинителство, односно за набавката на луксузниот мерцедес од 600.000 евра.
Одбраната на Груевски, кој е обвинет во случајот, немаше информации зошто Митревски не се појави во Судот. Судијката Добрила Кацарска побара од адвокатите да го повикаат во текот на денот, бидејќи во спротивно може да биде отповикан како сведок.
Во судницата се присутни останатите сведоци, кои треба да сведочат денеска, освен еден кој бил на службен пат.
Прв пред Судот денеска сведочи Виктор Белевски, вработен во МВР од 2002 до 2006 година. Тој бил шеф на обезбедувањето на поранешната министерка за внатрешни работи Гордана Јанкулоска, обвинета во случајот.
Белевски рече дека меѓу возилата кои ги имале за вип личности имало еден мерцедес од 1998 година, кој цело време имал дефекти. Додаде дека имал вербална расправија со министерката Јанкулоска, бидејќи барал возилото да се повлече, а таа инсистирала да се користи бидејќи немало друго.
Сведокот рече дека не успевале да излезат во пресрет на потребите за безбедност на странските делегации, бидејќи возилата долго време биле на поправка.
Обезбедувањето, како што додаде Белевски, барало да се повлечат старите и да се набават нови возила.
Во „Тенк“ обвинети се поранешниот премиер Никола Груевски, поранешната министерката за внатрешни работи Гордана Јанкулоска и поранешниот помошник министер во МВР Ѓоко Поповски. Пред две рочишта Судот донесе одлука да ја раздвои постапката за Јанкулоска поради „ризична бременост“.
На минатото рочиште повеќе од пет часа исказ даваа 11 сведоци на одбраната. Тие посочија дека набавката на новиот „мерцедес“ била неопходна, бидејќи старото возило често останувало во дефект и не било безбедно за превоз на „вип“ личности.