Најмалку пет лица загинаа во терористички напад, а 15 се повредени и пренесени во болница по силната експлозија што утринава се случи во центарот на сомалиската престолнина, Могадишу. Според локални медиуми, во експлозијата загинале осум лица, а се повредени најмалку 23 лица.

Експлозијата во близина на крстосницата К4, во срцето на Могадишу, беше толку голема што ги урна ѕидовите на блиското основно и средно училиште Мукасар, а во нападот се уништени и голем број автомобили.

Одговорноста за терористичкиот напад ја презеде групата Ал Шабаб која е поврзана со терористичката организација Ал Каеда. Цел на нападот бил конвој на Обединетите Нации (ОН), кој минувал по улицата.

Експлозијата била предизвикана од автомобил-бомба, најчест начин на кој оваа терористичка група ги изведува нападите.

Американската амбасада во Сомалија, преку Твитер, изрази сочуство до семејствата на жртвите и повредените и воедно потенцираше дека САД силно ги осудува сите облици на тероризам.

„Луѓето во Сомалија заслужуваат да живеат живот без страв од напади“, се посочува во американската реакција.