Најмалку едно лице се здобило со изгореници на лицето во експлозијата во лондонската метро станица Парсонс грин, во инцидентот што лондонската полиција официјално го прогласи за „тероризам“.
Попладнево е закажан состанок на Комитетот за итни ситуации што ќе го предводи премиерската Тереза Меј.
На станицата во југозападен Лондон експлодирала пластична кофа, но се уште не се знае што имало во неа.
Очевидците од самото место биле оддалечени десетина метри и сведочат дека виделе огнена топка, од која засега официјално е повредено едно лице, кое се здобило со изгореници.
Останатите се повредени во стампедото кое уследило, откако настанала општа паника во метро станицата. Дваесет и двајца се пренесени во болница.
Делови од лондонското метро се затворени, а тешко вооружена полиција е на самото место, додека антитерорстичкиот оддел започна истрага.
Скотланд Јард соопшти дека нема извештаи дека има уште некоја експлозивна направа.
Британскиот министер за надворешни работи Борис Џонсон изјави за Скај њуз дека е многу важно во овој момент да не се изнесуваат шпекулации.
-Очигледно, сите би требало да останат мирни и да продолжат нормално со животот, колку што е тоа можно, рече Џонсон.
На фотографиите до социјалните мрежи се гледа кеса од супермаркет со бела кофа од која излегува пламен и жици кои се гледаат од неа.
Презентарката на вести на Би Би Си истакнува дека видела жена на носилка со изгореници на лицето и нозете.