Шкендија е домаќин на Вардар, попладнево, во големото дерби на фудбалското првенство на Македонија. Натпреварот почнува во 14,30 часот и од конечниот исход ќе зависи и врвот на табелата. Вардарци пристигнаа во Тетово како лидери со два бода повеќе од домашната екипа. Во случај да останат да победат или ремизираат ќе останат и на највисокото место во конкуренција. Ако, пак, тетовци ги освојат трите бода, ќе бидат водечки во шампионатот по 11 одиграни кола. Главен судија на средбата е Александар Ставрев.
Денешниот меч ќе биде 42 меѓу „црвено-црните“ од Скопје и Тетово, најголеми ривали за титулата во оваа сезона. Бројките одат на страна на Вардар кој има 19 победи, Шкендија има 14, а пет меча завршија со нерешен резултат со вкупно гол-разлика од 55:37 во корист на тимот на чија клупа во моментот е Гоце Седлоски.
Вардарци немаат пораз во петте последни дуели со Шкендија. Во претходните два ги освоија бодовите и без примен гол. Првата пресметка во оваа сезона на „Филип Втори“, бранителот на титулата ја доби со убедливи 3:0, а со 2:1 славеше и при последното гостување во Тетово во октомври во 2014 година.
Она на што упатува статистиката е дека само еден натпревар на градскиот стадион под Шара завршил 0:0. На сите останати бил постигнат барем по еден гол што е доволна гаранција дека судирите меѓу овие два клуба носеле интересни фудбалски претстави, возбудувања и голови како што се очекува да биде и денеска.
Во останатите четири средби од 11 коло ќе играат: Работнички – Шкупи (арена „Филип Втори“ во Скопје), Брегалница – Пелистер (градски стадион во Кочани), Македонија Ѓ.П. – Ренова (стадион во Ѓорче Петров) и Победа – Силекс (СРЦ „Билјанини извори“ во Охрид). Почетокот на сите мечеви е во 14,30 часот.
Табела: Вардар 22, Шкендија 20 (-1 меч), Работнички 16, Пелистер 15, Ренова 15, Шкупи 10 (-1), Силекс 10, Победа 9, Брегалница 7, Македонија Ѓ.П. 6.