Албанскиот национален авиопревозник „Ер Албанија“ денеска реализира промотивен лет. Авион од типот „Ербас 319“ полета од меѓународниот аеродром во Тирана кон Истанбул, а првите патници беа најдобрите според успехот студенти и матуранти како и премиерот Еди Рама.
„Изборот први патници да бидат најдобрите студенти и матуранти е поради фактот што тие се светлото лице на другите генерации. Верувам дека тие ќе имаат среќна нога за авиокомпанијата“, рече Рама.
Претходно на инаугурацијата на компанијата Рама најави дека секој од авионите ќе носи име на албански поети. Првиот авион го доби името „Ласгуш“. По еден месец ќе полета авионот „Миѓени“ додека до крајот на годината „Имзот Ноли“ ќе лета на релацијата Тирана-Њујорк.
Рама најави изградба на уште три аеродроми во земјата – во Кукс, во Саранда и во Валона.
Албанската авиокомпанија „Ер Албанија“ беше формирана во ноември минатата година со помош на „Туркиш Ерлајнс“ за што голема благодарност Рама упати до шефот на турската држава Реџеп Таип Ердоган и на извршниот директор на турскиот авиопревозник, затоа што, како што рече, и обезбедиле ваква скапоцена помош на Албанија.
Тројца партнери во „Ер Албанија” се „Албконтрол” со 10 проценти што ја претставува албанската страна како и „Туркиш ерлајнс“ и „МДН Инвестмент” со 49 односно 41 процент од акциите.
Албанскиот премиер најави воспоставување на летови од Тирана до Скопје, Подгорица, Приштина, Сараево, Загреб, Милано и Лондон.