Рочиште за случајот „ТНТ“ на СЈО, што беше закажано за денеска напладне, се прекина кратко по неговото започнување, а причина за новото одложување на расправата, како што наведе судијата Огнен Ставрев е тоа што се уште нема одлука од Врховниот суд за изземање на Судечкиот совет во овој предмет.
Следното рочиште судијата Ставрев го закажа за 4 мај, во 11 часот.
Изземањето на претходното рочиште, што се одржа на 5 април, го побара одбраната на обвинетите Никола Груевски, Миле Јанакиески и Тони Трајковски.
Барањето, како што образложија адвокатите, е поради тоа што специјалната јавна обвинителка Катица Јанева дала изјава на национална телевизија дека има судии кои постапуваат по предмети на СЈО, а биле прислушувани.
Одложувањето на денешното рочиште беше извесно, бидејќи, како што соопштија од Врховен вчера за НОВА од Кривичниот суд добиле некомплетен предмет за барањето за изземање поради што испратиле писмо до првостепениот суд за комплетирање на предметот.
На денешниот претрес во судот беа присутни обвинетите Груевски, Јанакиески и Трајковски, како и оштетениот Фиат Цаноски.
Случајот „ТНТ“ се однесува на уривањето на комплексот „Космос“ на бизнисменот и претседател на Партијата за европска иднина (ПЕИ), Фијат Цаноски, во кој се обвинети поранешниот премиер Никола Груевски, поранешниот министер за траснпорт и врски Миле Јанакиески, поранешниот градоначалник на општина Гази Баба Тони Трајковски, градежна инспекторка од Гази Баба и тројца членови на општинската комисија за набавки.
Според обвинителниот акт, со постапката на уривање е предизвикана штета од 16 милиони евра, а дополнително на буџетот на општина Гази Баба уште три милиони денари.
Цаноски и фирмата ФИМЕТ најавија дека ќе поднесат побарувања за причинетата штета.
Инаку, освен во „ТНТ“, одбраната на обвинетите во случаите на СЈО побара изземање и на судечките совети во предметите „Тенк“, „Титаник“ и денеска во „Транспортер“.
Во врска со барањето за изземање на судиите во „Титаник“, што беше поднесено вчера, судијата Осман Шабани, соопшти дека барањето ќе го испрати во Апелацискиот суд Скопје, а оттаму најверојатно ќе биде препратено на одлучување во Врховен.
За разлика од „ТНТ“ и „Титаник“, Судечкиот совет во случајот „Тенк“, со кој претседава судијката Добрила Кацарска, во вторникот, неделава реши да го отфрли барањето на адвокатот Димитар Дангов за изземање на советот и на претседателите и на замениците-претседатели на Кривичниот и на Апелацискиот суд.
Кацарска, го отфрли барањето на Дангов како недозволено, повикувајќи се на член 35 став 5 од Законот за кривична постапка, според кој „за претседателот на судот не може да се поднесе барање за изземање, освен кога тој постапува како судија, а за неговото изземање одлучува претседателот на непосредно повисокиот суд.