Му предвидуваа светла кариера, некои во него гледаа и како евентуален предводник на новата генерација на тенисери, но Бернард Томиќ е пред истек на сопствениот рок на траење на АТП турот иако има само 24 години. Народот често знае да каже „до главата е“, фраза што одлично се надоврзува во случајот на Австралиецот со хрватски корени.
Не постигна резултати ни приближно до прогнозите и очекувањата, а „ѕвездата“ му згаснува. Процесот на негово тениско помрачување трае со месеци наназад. Со неколкуте испади при настапите одеше на нерви на публиката, на неутралните љубители на „белиот спорт“ и на страсните зависници. Се бараше соодветна реакција и од ИТФ и од АТП за недозволивото однесување на Томиќ за време на мечевите, за ноншалантноста, за бранење на противнички сервис со рачката од рекетот што се коси со етичките тениски и, пред се, спортски вредности.
Изборот на начини да изведува или, подобро речено, да се глупира во стилот „ми се може“ со кои требаше да се направи важен и да си даде до значење го направија еден од најнеомилените ликови на АТП турот. За запазување на статусот на професионалец да не говориме.
https://www.youtube.com/watch?v=iWmqjwB4TKE
Највисоката позиција што ја дофати на АТП ранг листата беше 17., сега е пат да падне под 60. место со тенденцијата на уште поголем надолен тренд. Во 2011 година стигна до четврт-финале на Вимблдон во кое играше со Ѓоковиќ, оваа година беше елиминиран во првото коло со изговор дека му е сеедно. Заработените пет милиони ева од настап на турнирите му удрија во глава без слава на момчето што не е на висина ниту на чорапите на големата четворка (Мареј, Надал, Федерер и Ѓоковиќ) во моментот.
„Досадно ми беше на теренот. Не знам зошто, но немам мотиви повеќе во тенисот. Сеедно ми е дали држам пехар во рака и играм добро или ќе загубам во прво или четврто коло на гренслем турнир“, рече „големиот“ Томиќ кој притоа не пропушти, како и претходно, да истакне дека заработил многу пари.
Австралискиот Хрват има неколку престапи и надвор од тениските терени. Неколку пати бил казнуван за управување на автомобил без возачка дозвола и други сообраќајни прекршоци, а двапати му беше покажана излезна врата од Дејвис куп репрезентацијата. Без афери не е ниту неговиот татко кој знаел физички да се пресмета со тренерите на „ѕвездата“.
Томиќ ги дочекува критиките во јавноста и од новинарите со смеење и возвраќа со провокација.
„Знам дека по тениската кариера ништо нема да морам да работам. Веројатно не ме сакате, но можете само да го сонувате она што јас успеав да го направам на 24 години. Можете да ги сонувате автомобилите и куќите што веројатно ги сакате додека јас ги купувам“, гласи само еден од контранападите на тенисерот.