Ден по сведочењето во процесот „Рекет“ на анонимен канал на „Youtube“ се појавија кратки аудио записи на кои, како што се тврди од поголем број медиуми, е снимен гласот на Орце Камчев како зборува за семејството на премиерот Зоран Заев, но и за политиката на Христијан Мицкоски. Со оглед дека Камчев не демантираше во текот на целиот ден дека тоа не е негов глас, иако има навика секогаш експресно да демантира некои написи, каков што беше примерот пред неколку дена кога беше објавено дека полицијата му упаднала во фирмите, а тој извести дека го посетиле само двајца инспектори на МВР, извесно станува дека тој зборува на снимките.
Овие аудио записи не се дел од доказите во предметот „Рекет“, потврдила обвинителката Вилма Русковска за некои медиуми и најави истрага за снимките како и кој ги снимил и кој ги објавил. Ако се има предвид фактот дека Ел Чека од Америка во голем број наврати објавуваше снимени разговори, пред се, со челниците од ДУИ, а сè уште нема негова одговорност, прашање е дали за овој случај надлежните органи ќе откријат нешто повеќе.
Орце Камчев на соговорникот му потврдува дека расчистил во живoтот со Сашо Мијалков, но остава впечаток дека сега Заеви и Мицкоски му се проблематични. Од Зоран Заев се плаши да не го стави во затвор, а од Мицковски ако дошол на власт ќе имало крв до колена. Според тоа што може да се слушне на снимката, тој бара состанок со Вице Заев, братот на премиерот, а се заканува и дека ако не се заврши некоја договорена работа, ќе крварат сите.
„Имаш ли влијание кај нив, утре да се видиме, да се разбереме со Вице. Ќе крварат и они и ние. Крв ќе има. Дај да пробаме да направиме некакво смирување и нешто со ВМРО-ДПМНЕ. Oни двајца со некакви двајца медијатори, наши, странски, да се закопаат секирите сите, привидно да се глуми кавга. Oни ќе изгубат, кај и да е ВМРО ќе си дојде. Ако треба крв и крв”, зборува машкиот глас на објавената снимка.
А потоа продолжува:
„Ќе пуштам од Бугарија, ќе „бомбардирам“ (алудирајќи на прислушувани разговори) како Ким Јонг. Па, тепајте се во Македонија. И ќе иде се у п…у матер. И ќе дојде Мицкоски и што правиме после? – Треба крв до колена? – Не се научија дека 30 години најпаметни Љупчо и Бранко испаднаа и после седнаа се договорија, така беше?“
Кому му зборува Камчев, ако е тој на снимката, не е познато. Непознато е и дали е снимен преку телефонски разговор или во разговор на маса. Втората можна опција ја посочуваат некои од опозициските портали. Дури одат до таму дека снимката била направена во Банско, Бугарија, на состанок на кој присуствувале петмина. Наводно снимал еден бизнис партнер на Вице Заев.
Овие портали пишуваат дека објавеното аудио е извадено од контекст, односно не било целосно објавено, туку само исечоци за да се постигне одредена цел. Состанокот траел со часови, а во јавноста се пуштени седум снимки по десетина секунди. Како и да е, гласот од снимката зборува како да поседува нешто што би го симнало Заев од власт.
„Никој не знаеме кој што има од тоа време. Јас што имам, значи сакам да ги рушам Заеви. Значи јас, сега видов, јас ќе бев во затвор, тоа нема да се деси. Што треба да претендирам да станам премиер да го добијам тоа. Не ме интересира, остајте ме, не барам ништо, не барајте ништо“, се слуша на тонските снимки.
Ако е точна тезата на опозициските медиуми кои споделуваат детали за состанокот и наводното снимање тогаш овие тонски записи не се дел од скандалот со прислушувањето. Со оглед дека тие
објавуваат и конкретни имиња на лица присутни на состанокот тогаш им се олеснува
потрагата на надлежните институции.