Маурисио Покетино во проблеми. Менаџерот на Тотенхем останува без Хари Кајн и Деле Али во наредниот период, а можеби и до крај на сезоната. Двајцата фудбалери на „спарси“ се здобија со сериозни повреди за време на мечот со Манчестер сити во четврт-финалето во Лигата на шампиони.
Напаѓачот на Тотенхем и на англиската репрезентација се повреди при дуел со Фабијан Делф во второто полувреме и веднаш беше повлечен од игра. Медицинските прегледи укажаа на кинење на лигаменти во скочниот зглоб и крајно е неизвесно дали капитенот ќе биде во можност воопшто да се стави на располагање на Покетино во завршницата на Премиер-лигата и за реваншот со Сити во ЛШ.
Деле Али, пак, излезе од пресметката со Манчестер сити со скршеницата на раката. Клупските лекари соопштија дека ќе направат дополнителна контрола и проценка на состојбата пред да дадат мислење дали би можел да заигра викендот против Хадерсфилд во Премиер-лигата.