Веста за смртта на Коби Брајант ја потресе планетата. Водечките светски медиуми го држат трагичниот настан на врвот на своите насловни страници со натпис „breaking news“ и „live update“ и постојано го освежуваат со информации за детали од САД.
Социјалните мрежи се веќе преплавени со емоции за еден од најголемите личности во поновата историја на кошаркарскиот спорт. Во изразувањето на сочувства, покрај колеги на Брајант, се придружија и политичарите кои со неверување ја примија веста за хеликоптерската несреќа во Калифорнија. Меѓу нив и претседателот на САД, Доналд Трамп.
„Медиумите известуват за смрт на големиот кошаркар Коби Брајант и уште три други лица во хеликоптерска несреќа во Калифорнија. Ужасна вест“, напиша Трамп на Твитер.
Во врска со трагичната смрт на Коби Брајант со изјава се огласи и градоначалникот на Лос Анџелес, Ерик Гарсети.
„Коби Брајант беше величина што инспирираше и воодушевуваше со својата појава и кошаркарски перформанси на теренот. Воодушевуваше со својот интелект и смиреност како татко и сопруг, како креативен генијалец и како амбасадор на играта што сакаше. Засекогаш ќе живее во срцата на жителите на Лос Анџелес и ќе остане запаметен како еден од нашите најголеми херои. Ова е момент кој остава без зборови. Тешко се опишува големината на шокот и тагата што ја чувствуваме“, напиша Гарсети.
Израз на тага и сочувство за смртта на Коби Брајант и од израелскиот премиер, Бенјамин Нетанјаху.
„Тажен сум од веста за смртта на Коби Брајант, ова е тажен ден за сите љубители на кошарката во светот. Коби Брајант, еден од најголемите кошаркари на сите времиња, загина во хеликоптерска несреќа во Калабасас во Калифорнија. Вечно ќе живее за неговата сопруга, за четирите деца и во срцата на милиони кошпаркарски фанови во светот. Нека поќива во мир“, е пораката на Нетанјаху.
Статуси со идентична содржина и од голем број славни личности од американскиот јавен живот, но и активни и пензионирани кошаркари како Скоти Пипен, Пол Пирс, Кевин Лав и многу други на кои им е тешко да поверуваат со извештаите на американските и светски медиуми за падот на приватниот хеликоптер на ѕвездата на лејкерси.
Засега нема официјални информации за причините за хеликоптерската несреќа. Дел од медиумите, повикувајќи се на очевидци, јавуваат дека во леталото избил пожар пред да се урне.