Трагична вест го погоди светскиот спорт. Американските медиуми јавуваат дека Коби Брајант го загуби животот во хеликоптерска несреќа во САД.
Информација за несреќата прв објави американскиот таблоид „ТМЗ“ за потоа и „Лос Анџелес Тајмс“ да излезе со фотографија од местото на несреќата со дополнување дека сите патници и членови на екипажот ги загубиле животите во падот на хеликоптерот.
„Свесни сме за вестите што кружат за Коби Брајант, наскоро ќе ве известиме со детали“, објави „Лоса Анџелес Тајмс“ на својата интернет страница.
Смртта на Коби Брајант е „брејкинг њуз“ во сите водечки американски и светски медиуми. Во извештаите на дел од нив се наведува дека Брајант го загубил животот со уште четири лица во уривање на неговиот приватен хеликоптер кај Калабасас во Калифорнија.
Медиумите, исто така, нагласуваат дека меѓу настраданите не се неговата сопруга и четирите деца.
Коби Брајант целата кариера ја мина во екипата на Лос Анџелес Лејкерс со која освои пет шампионски прстени во НБА лигата. Една сезона го понесе и признанието за МВП во американската професионална кошаркарска лига и две сезони беше најдобар стрелец.
Покрај петте клупски титули, Брајант има и олимписко злато со репрезентацијата на САД. Кошарката ја напушти во 2016 година.