Израел се согласил на 60-дневен прекин на огнот во Појасот Газа, објави американскиoт претседател Доналд Трамп на својата социјална мрежа Truth Social. Според него, договорот е резултат на „долг и продуктивен состанок“ помеѓу негови претставници и израелски официјални лица, а целта е да се отвори простор за завршување на војната во палестинската енклава.
Израел се согласи со потребните услови за финализирање на 60-дневниот прекин на огнот – период во кој ќе работиме со сите страни за да ставиме крај на војната. Катарците и Египќаните, кои работеа напорно за воспоставување на мир, ќе го достават овој конечен предлог, напиша Трамп.
Тој додаде дека очекува Хамас да го прифати предлогот, предупредувајќи дека понатамошно одбивање нема да донесе подобра понуда:
Се надевам, за доброто на Блискиот Исток, дека Хамас ќе го прифати договорот, бидејќи нема да се подобри – може само да стане полошо – рече Трамп.
Израелскиот амбасадор во Обединетите нации, Дани Данон, исто така ја потврди подготвеноста на Израел за примирје, истакнувајќи дека неговата земја е „апсолутно подготвена“ за прекин на огнот.
Сè уште нема официјален одговор од страна на Хамас во однос на предложените услови, што ја остава судбината на мировната иницијатива неизвесна.
Оваа најава доаѓа непосредно пред најавената средба помеѓу Трамп и израелскиот премиер Бенјамин Нетанјаху, закажана за следната недела. Трамп најави дека на состанокот ќе биде „многу строг“, што дополнително ја потенцира тежината на ситуацијата и неговата дипломатска офанзива.