Published: Thursday, May 14, 2020 09:37
Американскиот претседател Доналд Трамп има нова мета во војната со медиумите во САД. Тоа е „Гласот на Америка“, институција финансирана од САД и формирана во Втората светска војна за емитување независни вести и промовирање на американските вредности, што тој и неговите приврзаници ја обвинија за „срамно известување“.
Советникот за комуникации на Трамп, Ден Скавино на 9 април на Твитер објави текст на „Гласот на Америка“ за Кина. Покрај текстот, тој напиша дека „американските даночни обврзници ја плаќаат пропагандата на Кина преку „Гласот на Америка“, финансирана од САД и додаде „Срамно“.
Иако текстот што го објави Скавино всушност беше извештај на „Асошиејтед прес“, сепак Белата куќа наредниот ден го обвини „Гласот на Америка“ дека ги користи парите од даночните обврзници за да „зборува во име на авторитарните режими“, откако беше соопштено дека во Вухан е укината забраната за движење, кинескиот град во кој најпрво се појави жариште на новиот коронавирус.
Неколку дена подоцна, Трамп го оквалификува начинот на известување на „Гласот на Америка“ како „одвратен“. Притоа побара од Сенатот да го именува конзервативниот филмски продуцент Мајкл Пек на чело на Американската агенција за глобална радиодифузија, тело што ја надгледува работата на „Гласот на Америка“ и Радио Слободна Европа, Радио Слободна Азија и Радио Марти, чиј фокус е на Куба.
За именувањето на Пек за директор на таа Агенција денеска ќе гласа надворешно-политичката комисија на американскиот Сенат. Се очекува изборот да биде потврден, со оглад што мнозинството нејзини членови се од Републиканската партија. На сослушувањето во Конгресот во септември, Пек ја отфрли можноста дека со неговото именување Трамп може да добие контрола над „Гласот на Америка“.