Претседателот на САД, Доналд Трамп го осуди убивањето на дузина цивили во северниот дел на Сирија со хемиско оружје. Како што вели тој, ваквите постапки се спротивни од човештвото.
„Кога се убиваат мали деца, невини бебиња, со тоа се преминуваат неколку линии“, изјави Трамп одговарајќи на прашањето дали нападот ја преминал црвената линија кај него.
И додека Русија тврди дека чинителот на убиствата се бунтовниците а не режимот на Башар Ал-Асад, американските групи кои се дел од Обединетите нации тврдат дека Русија лаже и се залага за сиријскиот претседател.
„Веќе подолго време Русија го употребува лажниот наратив за да го пренасочи вниманието од нивниот сојузник во Дамаск“, рече Ники Хејли за време на последната, тензична дебата во Советот за безбедност на ОН.
Таа дури се закани дека бидејќи Обединетите нации потврфлуваат пред вакви проблеми, нејзината земја може да дејствува во свое име.
Но и покрај тврдењата дека Башар Ал-Асад самиот ги убива своите сонародници, тој го негира тоа и вината ја префрла кај бунтовниците со кои е во воен конфликт веќе неколку години.
Според Сириската опсерваторија за човекови права, при нападот во вторникот, 20 деца и 52 возрасни се убиени во провинцијата Идлиб. На социјалните мрежи и медиумите веќе се појавија видеа и фотографии од деца кои се гушат и се вознемирувачки за гледање.
Трамп тврди дека по последниот напад, негово мислење за Башар Ал-Асад комплетно се променило.
„Ви велам, моето мислење за Сирија и Асад се промени. Сега зборуваме за едно сосема друго ниво“, рече Трамп по средбата со кралот Абдула од Јордан.
Истовремено, државниот секретар на САД, Рекс Тилерсон ја повика Русија да размисли кога го поддржува Асад при неговото дејствување.
Веднаш по нападот Русите се огласија и потврдија дека сиријски авиони извршиле напади, но врз мини-фабрики за производство на хемиско оружје кои им припаѓале на бунтовниците.
Ова не е прв пат да сиријската влада биде обвинета за хемиски напад врз своите жители. Во август 2013 година Западот ја обвини владата на Асад дека извршила убиства во Дамаск, по што тој пак ги обвини бунтовниците.
Според официјалните бројки, над 250.000 луѓе загинаа во последните неколку години за време на граѓанската војна, но се чини дека ниту едно политичко решение не е на повидок и дека секојдневно само цивилите ќе страдаат поради страстите на политичарите.