Лукас Подолски на лето ја менува средината. Германскиот фудбалски ветеран потврди дека го напушта Галатасарај и ќе продолжи да игра во првенството на Јапонија за екипата на Висел Кобе.
„Потребен ми е нов предизвик. Сметам дека ова лето е вистинскиот период за заминување, но дотогаш ќе бидам максимално фокусиран на обврските кон Галатасарај“, напиша Подолски на „Инстаграм“.
Подолски доби понуда од Далечниот исток на која не можеше да одолее. Вредна е осум милиони евра по сезона додека турскиот гигант од Истанбул ќе добие 2,6 милиони евра како обесштетување со можност и за дополнителни 200.000 евра.
Фудбалерот со полско потекло и во јануари се поврзуваше со Висел Кобе, но тогаш го пролонгира трансферот по завршување на сезоната со цел да му помогне на Галата да ги реализира целите во тековниот шампионат на Турција.
Претходно во кариерата Подолски играше уште за Келн, Баерн Минхен, Арсенал и Интер. За Германија настапи во 129 меча во кои постигна 48 гола. По ланското Европско првенство во Франција, тој се повлече од националниот тим.