Рома вечерва се раздели со еден од своите стандардни првотимци во изминатите неколку сезони. Од „Олимпико“ потврдија дека дефанзивецот Костас Манолас (28) е продаден на Наполи за 36 милиони евра на колку што гласеше и неговата откупна клаузула.
Грчкиот репрезентативец ги парафира личните услови по неколкудневни преговори и на лекарски прегледи во Неапол е најавен во текот на оваа недела. Со наполитанците под водство на Карло Анчелоти ќе потпише договор на четири години, а се шпекулира дека од трансферот ќе добие околу 4,5 милиони вклучувајќи ги и бонусите.
Во спротивна насока ќе замине играчот за врска, Амаду Диавара кој моментно е со селекцијата на Гвинеја ја Африканскиот Куп на нации. Неговото појавување во Рим се очекува кон средината на јули по завршување на турнирот во Египет.
Римјаните беа принудени за продажба на Манолас до крајот на јуни за регистрација на трансфер во фискалната 2018/19 сезона. Гркот на „Сан Паоло“ оди како замена за Раул Албиол кој кариерата ќе ја продолжи во Вилјареал. На „Олимпико“ пристигна во 2014 година од екипата на Олимпијакос и оттогаш одигра 156 меча за „волчицата“ и постигна шест гола.