Иницијативата за заштита и унапредување на правата на трансродовите лица ТрансФормА потсетува дека секоја година, кога се приближува Парадата на гордоста, повторно се појавуваат истите прашања:
„А зошто нема парада за стрејт луѓето?“
„Зошто само ЛГБТИ+ заедницата маршира?“
„Зошто тие имаат право да слават, а ние не?“
Од ТрансФормА велат дека иако овие прашања звучат логично, зад нив стои недоразбирање на целта на Прајдот, па го даваат следното објаснување.
Тие велат дека стрејт луѓето секој ден можат да покажуваат љубов без страв.
Хетеросексуалните луѓе можат слободно да се бакнуваат на улица, да се држат за рака, да објавуваат фотографии од својата врска без да се прашуваат дали ќе бидат нападнати или исмејани. За нив, љубовта е призната како „нормална“ – таа е видлива во филмови, реклами, училишта, книги, семејства. Тоа е привилегија која често се зема здраво за готово, објаснуваат од иницијативата.
Никој не се обидува да им го забрани бракот, го наведуваат како уште еден одговор на прашањата зошто стрејт луѓето немаат парада.
Ниту едно политичко или религиозно движење не се организира за да го спречи правото на брак за хетеросексуалните парови. Ниту една петиција, ниту една уставна промена не е наменета за да им се ускрати тоа право. За разлика од тоа, ЛГБТИ+ луѓето низ светот се соочуваат со активни обиди за поништување на нивните семејни, љубовни и човекови врски, потенцираат од ТрансФормА.
Никој не ги напаѓа затоа што се стрејт, никој не ги казнува за нежност, никој не ги избркал од дома или работа затоа што се стрејт, наведуваат ТрансФормА.
Никој не ги следи по улица со цел да ги навреди или тепа затоа што се хетеросексуални. Никој не ги убива затоа што сакаат личност од спротивен пол. Во многу земји, ЛГБТИ+ луѓето живеат со страв – страв дека нивната љубов ќе ги чини живот.
Хетеро паровите не се опоменувани во ресторани затоа што се бакнале. Не се исфрлени од училишта затоа што признале кого сакаат. Не биле тепани во парк затоа што се држеле за рака. Но многу ЛГБТИ+ луѓе го доживеале токму тоа – и уште полошо.
ЛГБТИ+ луѓето и денес се соочуваат со отфрлање од семејството, откази од работа, па дури и бескуќништво – само поради тоа што се тоа што се. Стрејт луѓето не мораат да објаснуваат или кријат делови од својот живот за да преживеат. Тие се прифатени – автоматски, пишуваат на својот веб портал од иницијативата ТрансФормА.
Тие наведуваат уште две причини како одговор на претходните прашања кои се често поставувани периодот околу одржувањето на Парадата на гордоста: човековите права на стрејт луѓето не се доведени во прашање и Парадата на гордоста не е „привилегија“ – таа е борба.
Сите права што ги имаат хетеросексуалните луѓе – правото на љубов, брак, родителство, приватност, безбедност, достоинство – им се гарантирани. Тие не мораат да маршираат за да постојат. Нивниот идентитет не е политички ризик, ниту општествена опасност.
Прајдот не е за да се чувствуваме „посебно“. Тој е за да кажеме: „Постои место и за нас. И нема да не снема.“
Парадата е простор каде што конечно можеме да дишеме слободно. Да се држиме за рака без да се плашиме. Да бидеме гласни таму каде што сме биле замолчувани. Да бидеме горди таму каде што сме биле посрамувани.
Хетеросексуалните луѓе немаат парада затоа што не им е потребна. Затоа што живеат реалност за која ние сè уште се бориме. И ќе се бориме – се додека не бидеме еднакви, истакнуваат од ТрансФормА, првата и единствена иницијатива за заштита и унапредување на правата на трансродовите лица во Република Северна Македонија, предводена од трансродови лица.
Во саботата се одржа шестата Парада на гордоста во Скопје под мотото „Ќе (оп)стоиме заедно“. Годинава имаше само протестен марш, без традиционална прослава.