Драстично расте бројот на Британци кои аплицираат за државјанство на некоја од земјите во Европската унија (ЕУ) по референдумот за Брегзит. „Би-Би-Си“ доби податоци од 17 членки на Унијата кои позитивно се изјасниле по 12.994 британски барања за државјанство во 2017 година, во 2016 година таа бројка била за повеќе од двојно помала (5.025) додека во 2015 година изнесувала 1.800.
Земја чие државјанство најчесто добиваат Британците е Германија. Бројот на британски Германци од 594 во 2015 година достигна 7.493 лани, пренесува „Би-Би-Си“. Пораст е забележан и во случаи со други земји што се дел од европското семејство како на пример Франција, втора на листата, чии власти издале 1.518 државјанства, трета е Белгија со 1.381 издаден документ. Бројот на Британци кои лани добиле државјанство на Република Ирска е 529 што е десеткратно зголемување за разлика од 2015 година (54).
Како причини за барање на ново државјанство на Британците се наведуваат патување, живеење и работа во земјите на ЕУ по исходот на референдумот за Брегзит, а таков документ се надеваат дека ќе може да добијат и нивните деца. Тие во најголем дел поседуваат двојно државјанство со оглед дека го задржуваат британското иако поднесуваат барање за друго.
Критериуми за државјанство на некоја од земјите членки на Европската унија, сепак, исполнува мал број на Британци. Бирократскиот процес е тежок и бавен и може да трае со месеци, се наведува во статијата на „Би-Би-Си“. Варираат од земја до земја и понекогаш се сложени од аспект на потеклото, на семејните врски и на местото за престој. Во случајот со Германија постои и посебна одредба за лица чии претци биле жртви на нацистите.
Британците кои исполнуваат критериуми за државјанство на земја членка на ЕУ, своите барања ќе може да ги поднесуваат и по Брегзит. Но, притоа би можеле да се соочат со проблем во земји како Германија која дозволува двојни државјанства само за лица од други земји во Унијата. Ако во меѓувреме тоа не се промени, Британците во такви случаи ќе треба да се откажат од британското државјанство ако сакаат да го задржат германското.