Канадскиот премиер Џастин Труди изрази подготвеност неговата земја да ги прифати бегалците „без разлика на нивната вера“, ден откако Белата куќа донесе одлука и го забрани влезот во САД на државјани од седум муслимански земји.
„Сите кои бегате од прогон, терор и војна, да знаете дека во Канада ќе ве примиме без разлика на вашата вера. Нашите сили се во различноста. Добродојдовте во Канада“, порача Труди.
Премиерот на Канада не ја коментираше директно американската одлука, но пораката на Твитер е објавена ден откако Доналд Трамп ја потпиша извршната наредба со која на три месеци им се забранува влез во САД на државјаните на : Ирак, Иран, Либија, Сомалија, Судан, Сирија и Јеман.
Премиерот во декември 2015 година лично ги дочека првите сириски бегалци чие пристигнување го организираа властите со воспоставување на воздушен мост. Канада оттогаш прими 35.000 сириски бегалци.
Кабинетот на Труди, вчера доцна вечерта соопшти дека добил уверување од Вашингтон дека забраната нема да се применува на Канаѓани кои поседуваат двојно државјанство, канадско и тоа наведено во седумте земји.
„Добивме потврда дека со канадските државјани кои патуваат со канадски пасош, ќе се постапува како и досега“, објави портпаролката на Труди.