Владата на Црна Гора го отповика Бранко Азески од функцијата почесен конзул во Македонија. Во образложението на таквиот потег, како што пишува „Дан“, се наведува дека „конзулот се обидел да ги омаловажи и компромитира највисоките државни органи на власта во Црна Гора, истакнувајќи свои лични забелешки и предвидувања во поглед на работата на Владата“. Одлуката за отповикување на Азески е донесена на последната седница на црногорската влада.
– Се отповикува Бранко Азески од должноста почесен конзул на Црна Гора во Штип, Република Северна Македонија, со надлежности за Берово, Виница, Делчево, Зрновци, Карбинци, Кочани, Македонска Каменица, Пехчево, Пробиштип и Чешиново-Облешево, се наведува во решението што го потпиша црногорскиот премиер Здравко Кривокапиќ.
Според решението, црногорското Министерство за внатрешни работи дошло до сознанија дека Азески во вршењто на должноста почесен конзул ја користел секоја прилика со својот наратив да изрази сомнеж за угледот на Црна Гора и за кредибилитетот на нејзините органи. Се појаснува дека од безбедносните органи се особено забележани разговори на Азески со угледни деловни лица од различни сфери во кои се обидувал да ги омаловажи и компромитира највисоките органи на власта во Црна Гора, изнесувајќи свои лични забелешки и предевидувања за работата на Владата.
Во решението се истакнува дека Министерството за надворешни работи смета дека наведените настапи можат сериозно да го нарушат угледот на државата и дека нема основа за натамошно продолжување на неговата функција. Според официјалните податови, Азески бил почесен конзул на Црна Гора во Македонија од 2016 година.
Азески: Благодарам за соработката и посакувам брз развој на Црна Гора
Претседателот на Стопанската комора на Северна Македонија, Бранко Азески, кого Владата во Подгорица го отповика од функцијата почесен конзул во Скопје, утрово, преку соопштение до медиумите, се заблагодари за соработката и и посака на Црна Гора брз развој и просперитет, а на компаниите поголем профит.
– Црна Гора е независна и суверена држава, која согласно Уставот е дефинирана како граѓанска, демократска, еколошка и држава на социјална правда, заснована на владеење на правото. Иако независноста на Црна Гора е обновена на 3 јуни 2006 година, со истапувањето од државната заедница со Србија, таа претставува една од најстарите европски држави. На овие простори се простирала латинската провинција Превалис, средновековната држава Зета, а денес современата држава Црна Гора, која претставува своевидна раскрсница на која се испреплетени повеќе историски случувања, народи и култури (илирска, словенска, византиска, турска), како и религии (христијанска и исламска), кои оставиле свои траги до денешен ден. Голема благодарност до сите оние со кои соработував на оваа важна мисија за бизнисите на нашите две држави. На Црна Гора и посакувам брз развој и просперитет, а на компаниите поголем профит, наведува Азески.
Црногорската Влада го објасни потегот со отповикувањето на Азески со изјава дека се обидел да ги омаловажи и компромитира највисоките власти во Црна Гора презентирајќи свои лични забелешки и предвидувања во врска со работата на Владата. Како што објави весникот Дан, одлуката за отповикување е донесена на последната седница на Владата. Според одлуката потпишана од премиерот Здравко Кривокапиќ, Министерството за внатрешни работи дошло до сознанија дека Азески, при извршувањето на должноста почесен конзул, ја користел секоја можност да изрази сомнеж за угледот на Црна Гора и за кредибилитетот на нејзините тела.