Судењето за предметот „ТНТ“ за уривањето на комплексот „Космос“ на инвеститорот Фијат Цановски се враќа од почеток, откако еден од членовите на судечкиот совет дал неотповиклива оставка. Судијата Огнен Ставрев на почетокот на денешното рочиште, информира дека Судот добил писмено барање од судијата – поротник Лилјана Ивановска Кочковска, со кое таа дава неотповиклива отставка. Во писмото од Ивановска Кочковска, посочи судијата Ставрев, се наведува кога дала заклетва, кога и прекинала функцијата и дека има здравствени проблеми. Оштетениот во случајот, Фијат Цаноски се сомнева дека потегот на Кочковска е доброволен.

„Поротничката дала оставка пола час пред рочиштето. Се сомневам дека нејзиниот потег е самоволен, односно дека е поткупена од мафијата што владее во Македонија или, пак, имала некои други закани. Кога го велам ова мислам на Никола Груевски, на Миле Јанакиески и на Тони Јакимовски во чија режија беше спроведено рушењето. Убеден сум дека сето ова се диктира од Будимпешта. Иако случајот се враќа на почеток, сепак, јас не губам верба во правосудниот систем“, изјави Цаноски.

Судијата Ставрев, кој го води случајот „ТНТ“, пред денешното рочиште ги запозна присутните во судницата со содржината на писмото на Лилјана Ивановска Кочковска и ја повика одбраната, доколку има искрени намери, да не го одолговлекува процесот, иако тој се враќа од почеток.

„До одбраната. Ако е како што тврдевте, дека вашите барања изминатите два месеца биле за целисходноста на постапката, имате шанса да ја потврдите намерата. Ако е интерес на правдата можете до утре на рочиште да ја потврдите намерата и да ја почнеме постапката одново, но да го поминеме само со читање на досегашните материјали без повторно сослушување сведоци“, рече судијата Ставрев.

Во судница денеска не беа присутни обвинетите Тони Трајковски и Елизабета Најдовска. На прашање од судијата Огнен Ставрев до адвокатите Јовица Страшевски и Мерџан Даути каде се нивните клиенти, тие рекоа дека немале уредна покана за денешното рочиште.

Случајот го води судијата Огнен Ставрев, а застапник на обвинението е Бурим Рустеми од ОЈО Куманово. За делото обвинети се повеќе лица меѓу кои екс министерот за транспорт и врски Миле Јанакиески и тогашниот градоначалник на Општина Гази Баба Тони Трајковски, додека во отсуство му се суди на поранешниот премиер Никола Груевски.

Иако судскиот процес се враќа на почетокот, правни експерти за Нова ТВ рекоа дека тој не може да застари бидејќи станува збор за потеѓки кривични дела, но оставаат простор за разни злоупотреби при евентуална промена на власта.