Судот за спортска арбитража (ЦАС) во Лозана ја потврди децениската суспензија на албанскиот фудбалски клуб Скендербег што првично ја изрече Европската фудбалска асоцијација (УЕФА) за лажирање на натпревари во домашното првенство и во меѓународните лиги.
Од тие причини, клубот од Корча беше исфрлен од европските натпреварувања за сезоната 2016/17, но истрагата продолжи и на 7 февруари во Нион беше донесена најригорозната санкција што е за две години, временски, е подолга од онаа на Победа за двомечот со Пјуник во квалификациите за Лигата на шампиони за сезоната 2004/05.
„Суспензијата на УЕФА за десет години и паричната казна од еден милион евра се пропорционални и оправдани“, се наведува во соопштението на ЦАС.
Со ваквата одлука на ЦАС е шокиран претседателот на Скендербег, Ардијан Такај кој најави натамошна борба.
„Нема да го напуштам клубот. Ќе се жалиме и пред Федералниот суд на Швајцарија и таму ќе бараме правда. Овој случај ги надмина сите граници“, порача Такај.
Истражителите во извештајот дека се лажирани две средби во 2015 година во квалификациите за Лигата на шампиони од кои една против Динамо Загреб, а една против северноирски Крусејдерс, како и два меча во во истата година во УЕФА Европа лигата против Спортинг Лисабон и против Локомотив Москва. За посочените натпревари е наведено дека фудбалерите на Скендербег „играа исклучително сомнително во одбрана“ и „незаинтересирано и без труд“. Но, поранешниот првак на Албанија е санкциониран и за повеќе лажирани натпревари во националното првенство.