Судот за спортска арбитража (ЦАС) во Лозана, конечно, пресече во случајот со Аријан Адеми. Преполовена е суспензијата за 25 годишниот дефанзивен играч за врска и репрезентативец на Македонија од четири на две години и неговото враќање на фудбалските терени се очекува во октомври во 2017 година.

Одлуката на судот во Лозана ја потврдија и од хрватскиот шампион и, секако, е одлична вест и за селекторот Игор Ангеловски кој во иднина ќе може да смета на одличниот фудбалер од средниот ред.

Аријан Адеми беше суспендиран на четири години по позитивниот допинг тест по мечот против Арсенал во првото коло во Лигата на шампиони на 16 септември во 2015 година. На таквата одлука беше вложена жалба пред дисцилинската комисија на Европската фудбалска асоцијација (УЕФА), но притоа само беше потврдена првичната одлука.

Минатата пролет беше вложена жалба до ЦАС од каде денеска (24 март) стави крај на сагата и ја намали суспензијата на Адеми. Во меѓувреме тој играше фудбал на аматерско ниво, а во Динамо Загреб и во Македонија се надеваат дека ќе успее да се врати на врвното ниво пред добивање на казната. Во моментот на позитивните допинг тестови беше од големо значење за екипата од „Максимир“ и за репрезентацијата на Македонија со богати понуди за трансфер во неколку европски екипи.

Хронологија во допинг случајот со Аријан Адеми

7 октомври 2015 година – УЕФА поведува постапка против Адеми

21 октомври 2015 година – Адеми беше позитивен и на Б тестот

27 октомври 2015 година – одложена одлуката во врска со Адеми

20 ноември 2015 година – Адеми е суспендиран на четири години

13 мај 2016 година – Дисциплинската комисија на УЕФА ја потврди казната за Адеми

28 октомври 2016 година – одложена одлуката на ЦАС

15 февруари 2017 година – одложена одлуката на ЦАС

17 март 2017 година – одложена одлуката на ЦАС

24 март 2017 година – Намалена суспензијата на Адеми на две години