Судот за спортска арбитража (ЦАС) во Лозана ја одби жалбата на Фудбалскиот сојуз на Србија (ФСС) што се однесуваше на прием на Косово во Европската фудбалска асоцијација (УЕФА). Во образложението на одлуката се наведува дека ФСС имал причини за постапка за наведеното дека УЕФА го прекршила сопствениот Статут.
Адут на ФСС притоа беше членот 5.1 од Статутот кој вели дека за членство во УЕФА земјата мора да биде независна и да биде призната во Обединетите нации. Но, споменатиот член за Судот е „амбивалентен“ и бара појаснување.
„Кога ќе се земе предвид дека не постои формално признавање на земји во Обединетите нации, комисијата на ЦАС го интерпретира членот 5.1 од Статутот на УЕФА дека територијата на која се наоѓа фудбалскиот сојуз да биде призната како независна држава од мнозинство членки на организацијата. Комисијата утврди дека тој предуслов е исполнет кога е во прашање Фудбалскиот сојуз на Косово и дека таквиот заклучок е во рамки на искажаната волја на мнозинството на земји членки на Конгресот на УЕФА. Согласно ова, жалбата на ФСС е одбиена“, пишува во образложението на одлуката на ЦАС.
Косово беше примено за член на УЕФА во 2016 година со 28 гласа за и 24 против.