Централното Собрание на НДП едногласно изрази поддршка на консензуалниот кандидат за претседателските избори на Северна Македонија, Стево Пендаровски. Партијата, се вели во соопштението, од организирање на парламентарните избори во 2016 година дејствуваше со голема мудрост во формирање на парламентарното мнозинство што резултира со формирање на владината коалиција која презеде историска тежина за уставни измени, големи компромиси, јазична и граѓанска еднаквост и голема капитална инвестиција кон НАТО и ЕУ.
„Иако бевме мали и бевме нападнати од сите страни, останавме на истиот став со цел да не се дозволи враќање на процесите назад туку да одат кон вистинскиот правец на националниот интерес“, порачуваат од НДП.
НДП проценува дека поддршката за консензуалниот кандидат се случува за првпат во историјата на нашата земја и кандидатурата на Стево Пендаровски има значење и вреди да се поддржи и гласа бидејќи подразбира прифаќање на еднаквост на сите граѓани на земјата.
„Гласањето за консензуален кандидат е цврст доказ што дава постојан легитимитет на Преспанскиот Договор, на уставните промени, како и законот за употреба на јазици. Гласањето против консензуалниот кандидат или негово бојкотирање не е ништо друго освен обид за делигитимирање на досегашните достигнувања, за делигитимација на Договорот од Преспа, на законот за употреба на јазиците, на уставните промени и на еднаквоста на сите граѓани“, е наведено во дописот на партијата.
НДП го препознава моментот како историски и ги повикува Албанците заедно со сите други граѓани од помалите заедници да го поддржат консензуалниот кандидат. Само на тој начин, се нагласува во соопштението, може еднаш засекогаш да се стави крај на кандидати кои се ангажираат со поддршка на еден етникум, а другите да бидат нивни слуги за да имаат мнозиство.