Грчкиот премиер Алексис Ципрас изјави дека со зачленување на Грција во Иницијативата „16 + 1“ што ја сочинуваат земјите од Централна и Источна Европа и Кина, неговата земја ја потврдила својата водечка улога на Балканот и ја обновила репутацијата.
Грчкиот премиер изјави дека неговата земја е центар на поврзувањето на регионот и столб на стабилноста, безбедноста и соработката во североисточниот Медитеранот, особено по потпишувањето на Преспанскиот договор.
„Грција пред четири години беше неуспешна земја, „црна овца“ во Европа, без пристап до големите предизвици и случувањата во регионот и во конфликт со своите соседи“, рече Ципрас и нагласи дека земјата денеска ја признаваат сите и ја почитуваат, која излезе од големи економски проблеми и ја врати репутацијата.
Грчкиот премиер, исто така, истакна дека Грција требала да биде членка на Иницијативата „16 + 1“ од 2012 година, но дека Кина и други 16 земји не ја прифаќале токму поради „конфликтот” со северниот сосед, кој беше во таа организација, но под своето старо име.
„Грција очигледно не можеше да учествува“, рече Ципрас, додавајќи дека сите во Грција верувале дека грчката позиција за името на северниот сосед сите ја следат, а што беше погрешно.
Во групата „16+1“ членуваат 11 членки на Европската унија (ЕУ) и пет балкански држави меѓу кои и Македонија. Покрај нашата земја, дел од иницијативата се Албанија, БиХ, Бугарија, Хрватска, Чешка, Естонија, Унгарија, Летонија, Литванија, Црна Гора, Полска, Романија, Србија, Словачка, Словенија.