Каде се сите оние Македономахи (борци за Македонија)? – Ги виде ли некој? – Каде се сокрија сега кога господинот Мицотакис не само што се придржува, туку и го почитува Договорот од Преспа?, се запраша лидерот на СИРИЗА, Алексис Ципрас за време на настан на кој одговараше на 20 најпопуларни прашања поставени од членови на партиската платформа „iSYRIZA“ под наслов „I ask & watch“.
Запрашан за тоа дека „десничарската пропаганда успеа да создаде впечаток во јавноста оти левицата се идентификува со антинационалистичките сили”, поранешниот грчки премиер рече дека оваа пропаганда беше „посебно интензивна пред точно една година кога се гласаше договорот“, јави дописничката на МИА од Атина. Тој објасни дека тогашниот избор на „Нова демократија“ бил „да се идентификува со радикални мислења, со радикални кругови, да го труе грчкото општество и уште еднаш да направи поделба на патриоти и предавници”.
„Патриотизмот во ова време, современиот патриотизам, не е да ја мразиш татковината на другиот, туку да ја сакаш твојата татковина и да сметаш дека другиот има право да ја сака неговата татковина. Лани минавме низ тешки моменти. Но, денес, кој дискутира за тоа? – Каде се сите оние Македономахи (борци за Македонија н.з.) – Ги виде некој? – Каде се сокрија сите овие, сега кога и господинот Мицотакис не само што се придржува, туку и го почитува Договорот од Преспа?“, истакна Ципрас, осврнувајќи се на значењето на поимот татковина за левицата.
За Договорот од Преспа рече дека „ги одбраниле вистината и патриотскиот интерес“.
„Мислам дека пополека, и оние кои лани беа под влијание, излегуваа на улица и беа чувствителни, сфаќаат дека го сторивме тоа во корист на патриотскиот интерес. Бидејќи сега, кога Турција не провоцира, ќе има можност со нејзините Ф-16 да лета над Северна Македонија“, рече Ципрас одговарајќи на едно од 20-те прашања поставени од членовите на партиската платформа. Лидерот на СИРИЗА порача дека левицата „беше и останува патриотска сила и сила на национална одговорност“.