За реализирање на визијата за поинаков Солун, за Солун лидер на Балканот и основна трговска, транспортна, енергетска и економска точка во регионот, помага и Договорот од Преспа, рече грчкиот премиер Алексис Ципрас на средбата со администрацијата на Меѓународниот саем, јави МИА од Атина.
Ципрас овогодинешниот саем го карактеризираше како историски, бидејќи е прв во пост меморандумскиот период, а говореше и за визијата, Солун да стане економска и трговска престолнина на Балканот.
-Првиот чекор за ова е (Солун) да добие лидерска улога на Балканот и во рамките на оваа цел, за да ја реализираме оваа визија, длабоко верувам дека е договорот со поранешната југословенска Република Македонија што менува насока и ориентација на градот и на Северна Грција. Запира Солун и Северна Грција да се со свртен грб кон просторот што економски и трговски е од витално значење, а тоа се соседните земји и се ориентира за да стане основна трговска, транспортна, енергетска, економска точка на Балканот, а Солун да биде прво пристаниште на Балканот, ова е прв чекор за да имаме визија за еден поинаков Солун, рече Алексис Ципрас.
Најавени протести, градот под драконски безбедносни мерки
Солун е под драконски безбедносни мерки, а за да се спречат било какви инциденти ангажирани се над 5000 полицајци од цела Грција.
Свеченото отворање на Саемот ќе биде во 19 часот по локално време, а паралелно се закажани 4 различни протести.
Грчките организации од дијаспората и „Комисиите за борба за Македонија“ ги повикуваат Грците „на мирен и решителен начин, без партиски обележја и без говорници“ да излезат на протест Против Договорот од Преспа.
Според грчките медиуми, на повеќе локации во Солун, се појавија постери со грчкиот премиер и со пораката „Непожелен“.
Двата најголеми синдикати на вработените во приватниот и јавниот сектор, исто така ќе одржат протест, но исклучиво поради економската ситуација во земјата, со барање да се поништат сите мерки што произлегуваат од меморандумите.
Синдикатот ПАМЕ на Комунистичката партија на Грција, ги повикува граѓаните да им се придружат и против владината политика, но и поради Договорот од Преспа и НАТО.
Засебни собири закажаа и анархистичките организации и здруженија.
Оваа година, САД се почесна земја на Меѓународниот саем.
Утрово беше свечено отворен штандот на САД, во присуство на американскиот државен секретар за трговија, грчкиот премиер и министри од грчката влада.
Според најавите, се очекува оваа година, Меѓународниот саем во Солун да биде најголем до сега со 1500 штандови од 20 земји, а меѓу нив и Македонија, а процените се дека саемот ќе го посетат над 290 илјади посетители.
83. саем започнува денеска, а ќе трае до 16 септември. За време на саемот, обраќања и прес конференции, освен грчкиот премиер, ќе имаат и лидерите на речиси сите грчки политички партии.